عـلاقـة إسـرائـيـل بأفـريـقـيـا (( هـام جــدا ))

لما تيودور هرتزل مؤسس الصهيونية وحاييم وايزمان فكروا في اقامة وطن لليهود
اقترحوا ثلاث دول : ( أوغندا - فلسطين – الارجنتين ( 
وبالرغم من اختيارهم لفلسطين الا ان صلة اسرائيل بافريقيا لم تنقطع فضلا عن الجاليات اليهودية الكتيرة في افريقيا

 

ومنذ قيام دولة اسرائيل سنة 1948 زاد اهتمام اسرائيل بأفريقيا رغم انها دول صغيرة ومش هتستفيد بعلاقتها بحاجة لكن اسرائيل كانت عايزة اعتراف الدول الافريقية بدولة اسرائيل 
دا غير ان اصوات الدول الافريقية في الامم المتحدة مؤثر جدا وبيشكل حوالي 32 % من اصوات الامم المتحدة

 

و من اهتمام اسرائيل بأفريقيا تهديد الامن القومي العربي بصفة عامة والامن القومي المصري بصفة خاصة 
وبرضه خوف اسرائيل ان البحر الاحمر يتحول بحيرة عربية لان دا معناه سيطرة العرب علي مضيق باب المندب اللي ييعتبر المنفذ الوحيد لاسرائيل لأسيا وأفريقيا ولان البحر الاحمر بتمر فيه السفن الاسرائيلية لتوصيل صادراتها للخارج
واسرائيل بتهتم بدول ( حوض النيل ) الدول اللي بتتحكم في مياه النيل خصوصا أثيوبيا لتهديد الامن القومي المصري والسوداني وفي سنة 1990 زادت الاشاعات اللي بتقول ان اسرائيل بتساعد اثيوبيا لانشاد سدود علي النيل الأزرق اللي بيغذي نهر النيل بنسبة 80 %

دا غير المطار السري الاسرائيلي اللي موجود في أوغندا .... اللي اسرائيل هددت منه مصر انها هتضرب السد العالي منه في حرب الاستنزاف
ومع اهتمام اسرائيل بدول شرق أفريقيا بنلاقيها بتزحف لغرب أفريقيا عشان تشكل حزام تطويق تهدد من خلاله العمق الاستراتيجي للمغرب العربي

ومن أسباب اهتمام اسرائيل بافريقيا
ان افريقيا بتعتبر سوق ضخم يساعد علي زيادة الصادارات الاسرائيلية ودا معناه ان اسرائيل عايزة تنافس المنتجات العربية الموجوده في الاسواق الافريقية
دا غير الاستثمارات الاسرائيلية في افريقيا اللي بتخلق فرص عمل للشباب الافريقي وبكده تقدر تحقق التلغلغل داخل المجتمع الافريقي وتسيطر عليه

وبكده نقدر نقول ان اهتمام اسرائيل بافريقيا من الناحية الاقتصادية بيهدف لنقطتين :

 1 - استغلال موراد الدول الافريقية ومنها علي سبيل المثال لا الحصر استغلال اسرائيل دولة جنوب افريقيا للحصول منها علي مادة اليورانيوم لتصنيع قنابلها النووية واستغلال اسرائيل لدولة الكونغو ودولة سيراليون اللي يعتبروا أكبر الدولة في انتاج الماس بعد روسيا 
والماس اللي أغلي من البترول اسرائيل بتشتريه من الكونغو وسيراليون بأرخص الاسعار مقابل توريد شحنات سلاح

النقطة التانية : 2 - اسرائيل بتضع خطة بعيدة المدي عشان تجعل الاقتصاد الافريقي معتمد علي اسرائيل

 

وبالنسبة للمجال الامني والعسكري
فـ اسرائيل بتقدم المساعدة للدول الافريقية في مجال صناعه الاسلحة وتوفير الخبرات في المجال الاستخباراتي وجمع المعلومات والتدريب العسكري وبتزودهم بالتكنولوجيا المتطورة
ودا لان اسرائيل عايزة تثبت للدول الافريقية تفوقها التكنولوجي والعسكري والعلمي وبالتالي يحصل تهميش للوجود العربي في افريقيا واجبار الدول الافريقية علي الاعتماد علي اسرائيل

كـلـمـة أخيرة للعرب ياريت نهتم بأفريقيا ونتعامل معاهم (( بدون تعالي )) حتي لو كانوا ضيوف في أوطانا 

ملحوظة هامة 
دا مقال في مجلة السياسة الدولية وشكرا للصحفي اللي كتبه اللي مش متذكر اسمه
وانا اختصرته علي قد ما أقدر عشان نستفيد منه